Hoppa yfir valmynd

PFS kallar eftir samráði um heildsölugjaldskrá fyrir lúkningu símtala í farsímanetum

Tungumál EN
Heim

PFS kallar eftir samráði um heildsölugjaldskrá fyrir lúkningu símtala í farsímanetum

11. ágúst 2015

Póst- og fjarskiptastofnun (PFS) hefur nú framkvæmt verðsamanburð til að ákvarða hámarksverð fyrir lúkningu símtala í einstökum farsímanetum sem gilda skulu á árinu 2016. Verðsamanburðurinn byggir á ákvörðun PFS nr. 20/2015 frá 31. júlí sl., um útnefningu fyrirtækja með umtalsverðan markaðsstyrk og álagningu kvaða á heildsölumörkuðum fyrir lúkningu símtala í einstökum farsímanetum (markaður 7). Framkvæmd og niðurstaða verðsamanburðarins er nánar tilgreind í þeim ákvörðunardrögum sem hér eru lögð fram til samráðs.

Samkvæmt ákvörðun PFS nr. 20/2015 skal stofnunin áfram beita verðsamanburði til að ákvarða hámarks lúkningarverð íslenskra farsímafyrirtækja eins og gert hefur verið síðustu ár. Niðurstaðan skal byggjast á meðalverði þeirra EES-ríkja sem beita þeirri aðferðarfræði við kostnaðargreiningu sem nánari er lýst í framangreindri ákvörðun og nánari grein er gerð fyrir í frumdrögunum sem hér eru lögð fram til samráðs. PFS skal taka ákvörðun um hámarks lúkningarverð íslenskra fjarskiptafyrirtækja, eigi síðar en 1. nóvember ár hvert að undangengnu innanlandssamráði og samráði við Eftirlitsstofnun EFTA (ESA).

Núverandi lúkningarverð, sem gildir á árinu 2015, var ákvarðað með ákvörðun PFS nr. 24/2014, frá 31. október 2014 en þá kvað stofnunin á um að lúkningarverð skyldi lækkað úr 1,64 kr./mín. í 1,52 kr./mín., frá og með 1. janúar 2015.

Niðurstaða frumgreiningar PFS, sem hér er lögð fram til samráðs, er að frá og með 1. janúar 2016 til og með 31. desember 2016 skuli lúkningarverðið vera 1,40 kr./mín. hjá öllum íslenskum farsímanetsrekendum, þ.e. Símanum, Vodafone, Nova, IMC/Alterna og 365.

Óskað er viðbragða fjarskiptafyrirtækja og annarra hagsmunaaðila við þeim frumdrögum sem hér liggja fyrir, sbr. 6. gr. laga nr. 69/2003 um Póst- og fjarskiptastofnun. Allar athugasemdir skulu gerðar með greinanlegum hætti þar sem vísað skal í þá liði sem um ræðir.

Frestur til að skila inn umsögnum og athugasemdum er til og með 1. september nk. PFS mun þá fara yfir niðurstöður samráðsins og senda uppfærð drög að ákvörðun til samráðs hjá ESA síðar í mánuðinum.

Nánari upplýsingar veitir Hulda Ástþórsdóttir (netfang: hulda(hjá)pfs.is)

PFS mun birta opinberlega allar athugasemdir sem berast, nema sérstaklega verði óskað trúnaðar og mun þá stofnunin leggja mat á slíka beiðni.

Sjá samráðsskjölin (PDF skjöl):

 

 

 

Til baka